أتمنى تفاعل الأعضاء مع القصة ..
لأنهااا روعه..لا تفوتكم..


مقدمــة سريعه على القصة قبل الخوض في شخصياتها ....

من قبــل 30 سنــه عاشت عائلــة الــ( مـ....) المكونه من اب وام وولدين (سليمان-صالح) في مدينة من مدن السعوديه وصادفت انهم جاوروا نــاس طيبين عائله مكونه من 4 بنات وولد

.. الوسطى وللاسف توفت في حادث
وبقت الــ 3 بنات.. كبروا هالبنات وصار وقت كل وحده تعيش حياتها مستقلـه ...

والولد ( مساعد) عاش حياته في بيت ابوه لسه

الولدين من عائله الـمـ..... خطبــوا الاختين..والاخت الثالثه جاها نصيبها بعد..

وعاشوا بســلام حياه هادئه ولله الحمد بدون اية مشاكل
مرت الايام والاختين والزوجين علاقتهم ببعض ولا احلــى جابوا العيال ....

وتبتدي احداث القصه لما العيال يكبروا....

تعريف بالشخصيــات :

عائلـــة سليمان (ابو سعود) .. الاخ الاكبر....

سليمان: صاحب اكبر مصانع للمفروشات والاثاث بالمنطقه رجال طيب وحنون وهو مع اخوه اغنياء ولله الحمد

احلام(ام سعود): زوجة ابو سعود حرمه مؤمنه وقلبها واااسع اللي يمزيها هدؤئها وعقلها

سعود: الابن الاكبر.. قمة الثقل والغرور ومع ذلك اخلاقه لايعلى عليها عمره 26 كان متزوج من بسمه بنت تقرب له من بعيد بس توفت بعد اقل من 5 سنوات من زواجهم وتركت له بنته رزان 7 سنوات..
يكره فكرة الزواج من بعد بسمة لان حبها لازال بقلبه ومخليه عمي عن كل البنات...

اسماء: تجي بعد سعود 21 سنـــه ماخذه من امها شكلها الخارجي
.. خفيفة دم وطيووبه كانت مخطوبه لولد عمها وولد خالتها بنفس الوقت ( ريان) بس شائت الظروف والاقدار تفرقهم... تدرس انجليزي .. وللحين ترفض اللي يتقدموا لها لان بعد تجربتها السابقه صار تفكيرها منحصر حول دراستها وبس

فارس: 19 سنــه ولد حبوب وكوووول وصرقعه درجة اولى يمووت في شئ اسمه مجمعات ومغازل
ياما وياما صارت له مواقف كان بيروح فيها بس ابو طبيع مايجوز عن طبعه يمووت في البنات مافي فايده
يدرس في الكليه الصحيه. ماخذ الحياة ايزي ياعزيزي

اخر العنقود : جوري وعمرها 17 ونص متخرجه من ثالث ثنوي وسجلت علوم طبيه وانقبلت ...
مافي اطيب من قلبها واحلى من سوالفها وقريبه من كل اخوانها .. وتحتل في قلب ابو سعود اكبر المساحات
ولها نصيب الاسد من كل شئ.. صحيح هو مايفرق بينهم لكن عنده جوري غيييير...
..............

عائلــة الاخ الاصغر من ابو سعود .. صالح (ابو ريان)

صالح: ينشرح له القلب بسرعه عيبه انه عصبي .. هالشئ يخلي عياله يدارونه ومايحاولوا يثيروا اعصابه

انتصار( اخت احلام مثل ماقلت طبعا) : اطباعها بعيده شوي عن اطباع اختها .. تحب الضحك وهالسوالف فيها صفة الخووف بشكل مو طبيعي لهالسبب مجننيها عيالها ياما حطوا لها بالفراش حشرات بلاستيك وهي المسكينه كانت بتروح فيها

ريــان : الاكبر واول العنقود.. 25 رفيق سعود الروح بالروح متزوج من لطيفه وعنده رامي 4 سنوات وهاني سنتين ونص.. من بعد ماطلق بنت خالته (وبنت عمه بنفس الوقت) تزوج من لطيفه حتى ينساها
حياته عاديه مافيها هذاك الحب الكبير لان قلبه كان عند اسماء ومن بعدها وين يقدر يحب لطيفه المسكينه

دينـــا : الاستشاريه النفسيه درست بأمريكا وجات للسعوديه وفتحت لها عياده وماشيه امورها تمام
وهي على وشك الزواج من تركي الشاب اللي درس معاها بأمريكا وحبته .. بتعرفون شخصيته مع الاحداث
وعمرها 23... جمالها رباني ونعووومه حييل .. لهالسبب تحس نفسها ملفتة للنظر وين ماراحت

ديمه: اظرف بنت بالعائله تحب الموسيقى والرقص والهبال والجنون بشكككل وتموت بشئ اسمه حيوانات وعندها كلب اسمه لولي وثعبان متخيلين ان عندها ثعبان !! من تركيا جابته مخصوص لهنا
تحب الاغاني الغربيه وستايلها غربي بحت 16 وقريبه من جوري بنت عمها كثييير
...............

واخيــرا عائلة الاخت الثالثه امال... متوفي زوجها اللي كان ولد خالتها وترك لها 3 بنات وولدين

امل :مدرسة لغه عربيه قريبه للقلب اللي يمزيها ذكائها وخفة دمها وطولها .. طويله بشكل !!

اميره: او نقدر نسميها العفريته ورفيقة ديمه بنت خالتها حييل تدرس معاها بنفس المدرسه

اماني: اللقافه بالسعوديه كلها بهالبنت ملقوووفه بشككل تحب تعرف كل شئ بنفس عمر جوري بنت خالتها وبتدرس معاها علوم طبيه

فؤاد: طيب وحنووووون ورومنسي وجنتل مان .. محبوب من البنات بس مايحب منهم الا وحده اسماء بنت خالته بس هي معطيته طنااااش مسكين مايستاهل

خالد: مادري ليش الكل يحسه ثقيييل دم على عكس فؤاد يغار احيانا من حب الناس لاخوه وهو مع ذلك يحاول يتقرب للناس ويكسب ودهم....

نوصل لاخر ابطال الفصه مساعد ( الاخ الوحيد للثلاث خوات انتصار واحلام وامال ) : يعشق العزوبيه ومايحب طاري الزواج اصلا.. يمكن لان للحين ماشاف البنت اللي قدرت تغير رايه وتخليه يتزوجها
محبوب من كل عيال خواته ومقرب لهم كثييير.. لان اقرب وحده له جوري مايدري ليش يرتاح لها من بد كل بنات خواته...
وهي نفس الشئ تعتبره اخوها وخالها وصديقها ..

نبــدأ في القصه والشخصيات الباقي بتعرفونها ان شاء الله مع سياق الاحداث.....

حس بحد يدخل الغرفه ويشغل الانوار..كشر وانقلب عالجهه الثانيه..

اسماء وهي تشيل البطانيه: سعود كل هذا نوم؟
سحب البطانيه من يد اخته وغطى راسه فيها
اسماء: شلون يعني باروح السوق ياخوي تكفى يالغالي قوم
سعود: اووه اسماء تعبان روحي مع السايق
اسماء: فارس ماخذ سيارته
سعود: وليش وين سيارة اخوك فروس؟
اسماء: اوه صح انت مادريت انه صدم فيها
قام وهو مختلع ...
سعود: شنوووووووووو؟ عسى ماصار فيه شئ؟
اسماء: لاتطمن بس راحت السياره
سعود: لحوووول شفيه هذا اخوك وربي الااقول الى ابوي ماياخذ له سياره
اسماء: ماعلينا منه يلا سعود باروح باخذ فستان لحفلة بنت عمك

دخلــت بهالوقت بنته رزان ونطت عالسرير
رزان : بابا سعود بنروح السوق
سعود وهو يضم بنته : يابعد عمر سعود انتي علشانك بس
اسماء: أي انا اترجاك مطنشني لكن بنتك الدلوعه وافقت على طول
سعود: تقارنين نفسك يادبه بأرق بنوته باالدنيا
اسماء: هين ياسعيدان
سعود: سعود تاج راسك شنو اصغر عيالك سعيدان
اسماء: خلاص لاتزف يلا حبيب ئلبي بنرووووووووووووووووووووح اوف
سعود: طيب دقايق بس...

قام اعتــدل في جلسة وهو يتخيل شكل دينا بنت عمه مع خطيبها تركي.. اللي مادخل مزاجه اصلا..
سعود: تصدقين سموي تريكان هذا مادخل مزاجي
اسماء: انت اللي بتتزوج ولا البنت خلوها براحتها تختار اللي تبي
سعود: ياعيني عليك شنو تتزوجه وريان مو موافق عليه.. عليها هالبنت جرأة تحدت اخوها ووافق عليه اوف من هالبنات
طالعت اخوها ببرود وطلعت من الغرفه مع بنته.. وقف يطالع بنته رزان بحزن... اااه يابسمه كيف رحتي وتركتيني وحيد مع هالبنت المسكينه يتيمه..تضحك لي وانا عارف ان داخلها الف علامة استفهام تدورك كل يوم بين كل الوجوه وتستنكر ان كل صاحباتها عندهم امهات بينما هي لا..اييه الله يرحمك ويغمد روحك الجنه

هذا هو حال سعود من يوم ماتت زوجته بسمه كل ليله يناجي الليل ويسأله عنها ويعتصر داخله الاف المواقف والذكريات الحلوه اللي مرت عليهم...

وهم بالسياره كانت رزان جالسه بالسيت اللي ورا بس في الوسط يدها اليسار على كتف ابوها والثانيه على كتف عمتها...
اسماء: جد ياسعود انت مغبر..مافي احلى من ام كلثوم اوووف
سعود: انتي شدخلك في مسجلي هااا ولا بس لقافة بنات تبين احط لك اه ونص ولا اخصمك اه
اسماء: لا مو كذا بس حط راشد نبيل شعيل او الرويشد أي شئ مو ذي
سعود: اقول لايكثر احمدي ربك طلعتك من البيت تبين ارجعك؟
اسماء : لا خلاص بسكت يابعد عمري ام كلثوم.. زين كذا
حطت يدها على فمها ورزان تضحك عليها...
سعود: شفتي بابا كيف عمتك دبه وخبله
رزان: عمتي اسماء حلوه مو دبه
سعود: اجل انتي الدبه صح؟
رزان: لا انت بابا دب
اسماء: ههههههه تستاهل
سعود: انا دب هين اوريك

وصلــوا للسوق وهو حمل بنته بيد وحده في الهواء وهي تصارخ وخايفه
رزان: لاااا بابا لا اخاااااف
اسماء: سعود حرام عليك عاااد
نزلها وبقى ماسك يدها بقوه... من يوم اللي توفت زوجته وهو خايف على هالذكرى اللي خلفتها وراها من نسمة الهواء الطايره...

...........................

لبست فستانها الوردي للمــره الالف ووقفت قدام المرايه...
لطيفه: والله حلو يادينا
دينا لزوجة اخوها: لطيفه جد يعني ولاتجاملين
لطيفه: وربي تهبلين ماتدرين عن نفسك يعني
دينا: يعني انا احلى من تركي كثير؟

طلعت صورته من الدرج وعطتها مرت اخوها
لطيفه: اكيد احلى منه
دينا: بس تركي بعد حلوو ووسيم
لطيفه: مااختلفنا بس انتي احلى منه وافــ...
سكتت ونزلت راسها... خبله انا شكنت بقول وانتي افضل منه بكثير وهو مايستاهلك.. البنت ملكتها بكره لازم اخرب فرحتها يعني
دينا: وافضل منه صح؟ ليش ماقلتيها
لطيفه وهي تحط يدها على ظهر دينا : اسفه دندون تعرفيني ساعات اخربط بالحكي
دينا: ابي افهم ليش كلكم مو مقتنعين بتركي.. اموت واعرف السبب رغم انه فل اوبشن من كل النواحي
لطيفه: تقوليها يادينا بكل ثقه متأكده من كلامك ومشاعرك؟
دينا: لطيفه شوفي..تركي درس معاي 5 سنوات وصار بيننا اخذ وعطى عرفته واكتشفت انه مؤدب ومحترم لذلك يعجبني
لطيفه: بس يادينا انتي صدمتينا لما وقفتي بوجه اخوك ريان لانه رافض تركي
دينا: لان ريان ماله حق في اللي سواه...
لطيفه: مو هذا موضوعنا الحين يادينا اخوك زعلان منك...
دينا وهي تنزل راسها : ادري
لطيفه: روحي راضيه
قامت بدون تردد ووقفت بتطلع من الغرفه ...
لطيفه: دينا... بتلقين ريان فوق بقسمنا حطي علي كتفك شئ
دينا: اووه صح
راحت اخذت شال وحطته على كتفها وصعدت له فوق بقسمهم...
لقته يشرب ماي ومعطيها ظهره...لما خلص لف وشافها ماقدر يحط عينه بعينها لذلك رجع وعطاها ظهره
دينا: ريان بعدك زعلان؟
ريان: ليش يهمك
قربت منه لين صارت مقابلــه
دينا: كيف مايهمني وانت اخوي الوحيد اللي احبه
ريان: دامي اخوك الكبير والوحيد ليه توقفين بوجهي وتعارضين كلامي علشان واحد غريب
دينا: ريان ماله داعي هالكلام اللي صار صار... وبكره ملكتي وزعلك ماراح يقدم ولا ياخر
ريان: للاسف معاك حق
دينا: خلاص عاد ياشينك اذا زعلت
ريان: مو زعلان يادينا بس انا ماتوقعتك في يوم تعارضين كلامي وتتحديني
دينا: لو مو مقتنعه بتركي لهالدرجه واحس انه كامل والكامل الله ماسويت اللي سويته
ريان: دينا كيف تحكمين عليه بالكمال وانتي ماعاشرتيه ماشفتي اطباعه و اخلاقه.... ماتدرين هاالانسان وش وراه
دينا: ريان ان بعض الظن اثم انسى خلاص

نزل لمستوى اخته وباسها على جبينها وابتسم
دينا: مو تزعلني وتخرب علي فرحتي ياريان
ريان: ماعاش اللي يزعل دندونتنــا مبرووووك
دينا بفرح: الله يبارك فيك

............................

قبل مانكمل احداث القصه بذكر لكــم شئ .. سعود ودينا عيال عم وخاله مثل ماذكرنا وابو سعود كان مختار لولده دينا بحكم الصله والقرابه اللي بينهم.. لكن هو رافض هالشئ واقترح ان امه تخطب له بنت غيرها وبالفعل خطبت له بسمه... ومن بعد هالخطوبه صارت مشاكل ماتنتهي بين سعود وابوه ...
زعل عليه فتره طويله لان رفض بنت عمه وراح للبعيده....
بس دينا فرحت لهالشئ لانها ماكانت بترضى بسعود مو لشئ .. او لان فيه عيب لا بالعكس
بس كبريائه وغروره احيانا وثقته الزايده بنفسه تخليها تنفر منه....
لذلك فرحت وانبسطت وسافرت لامريكا تدرس .. والحين رجعت ومعاها حلم وردي تنتظر متى يكتمل وتعيش مع اللي اختارة قلبها بسعاده.....
وسعود حمد ربه مااخذ دينا لان موقفها مع ريان خلاه يغير نظرته لها مو عاجبه تحديهالاخوها علشان غريب!

......................

طلعت مع اخوها وبنته من اخر محل وهي تحس انها متكسره
اسماء: ويلي ويلي بامووووت ياخوي كله من دينوه باوريها بكره
سعود: والله ماحد قالك لفي المجمع كله وبعدين ماتطلعين الا بهالكيس الصغير
اسماء وهي تتخيل شكل دينا بكره: الله يسعدها تستاهل كل خير ...
سعود وهو يطالع اخته بنص عين : وبنت عمها تستاهل كل خير بعد
فهمت قصده ولفت الجهه الثانيه
سعود: صح كلامي ولا؟
اسماء: سعود مااحب اتكلم في هالموضوع
سعود: انتي ليش ماتبين الاستقرار؟
اسماء: من يقول... في بنت ماتدور على الاستقرار
سعود: أي انتي... 4 سنوات ونص من انفصلتي عن ريان وللحين ترفضين اللي يتقدمولك...
اسماء: اووه ياسعود خلاص عاد مو وقتــه
رزان لما حست ان نبرة صوت عمتها ارتفعت شوي عن المعدل الطبيعي عطتها كف على خدها
رزان: مو تصارخين على بابا
سعود: هههههههههههههههههههه عاشت عاشت بنتي
اسماء: ايالــ... ولا تدرين ماراح اقولها حتى مايزعل البابا حقك روحي ماابيك
بعدتها عنها ووسعت بخطواتها وسبقت اخوها..
سعود: زعلت الدلووعه
مسك بنته وسبقوا اسماء .... وهي منقهره منه ومن مزحه...
سعود: ههههههه يابعد عمري يااختي زعلتي
اسماء: روح عني
سعود: لالا لازم اراضيك ياحياتي
اسماء: مايحتاج ترى انادي لك الهيئه واقول لهم متزوج وعنده بنت ويغازلني
سعود: علشان اذبحك ياسمووي
اسماء وهي تمسك ذراع اخوها: سعود شوف هذا اخوك فرووووس

طالع وشاف اخوه واقف مع هيئة الامر بالمعروف ..
اسماء: ههههههه الحق عليه قبل لاياخذوه معاهم
سعود: الله يغربله ويفشله مثل ماهو مفشلنا بكل مكان امسكي رزان وباروح اشوف شالسالفه
راح لهم وهو منحرج من رجال الهيئه
سعود: السلام عليكم
الرجال: وعليكم السلام
فارس بخوف: سعود؟ كيف جيت هنا
سعود وهو يقرب من اخوه بعصبيه: شغلك في البيت يافريسان مو هنا والله لاخبر ابوي عنك
فارس: ماعليه اتحمل كفوف ابوي بس ماابي انام الليله بالمركز عندهم تكفي سعود حبيبي انت
سعود: والله تستاهل.. خليهم ياخذوك ويحلقون هالشعر عالزيرو ويطقوك طق عمرك ماذقت مثله علشان تعرف تغازل بنات الناس مرة ثانيه
فارس: لاتكفى سعود انا اخوك الوحيد تسوي فيني كذا تكفى طلعني منها...
سعود وهو يكلم الرجال : اقول ياخوي ترى اسفين اولا عاللي صار وان شاء الله مايتكرر. بس تراه مراهق خبل مايفهم
طالع فارس اخوه بنص عين... مراهق خبل ياسعيدان هااا ماعليه مقبوووله
الرجال: انت بصفتك من يااخ تدافع عن هالشخص
سعود: اخوه الكبير طال عمرك
الرجال: الوالد وينه متوفي؟
فارس وهو يهب في وجه الرجال: فال الله ولافالك شنو متوفي ابوي حي يرزق
سعود وهو يضرب كوعه ببطن اخوه: هههه يمزح وياكم خفيف دم ههه... الوالد ياطويل العمر حي موجود
الرجال: اخوك يلاحق بنات الناس والله عيب هالتصرف شنيع
سعود: طيش شباب هالمره فوتوها له وعلى مسؤوليتي انه مايتكرر ومستعد اتعهد بهالشئ
الرجال: مانقدر لازم ناخذه معانا
سعود وهي يلفق كذبه حتى ينقذ اخوه : لا ياطويل العمر الوالد مريض معاه القلب لو يدري انكم ماخذينه بيروح فيها يرضيك هالشئ؟ انت طيب وفاهم طوفها لهالمراهق هالمره
الرجال: خلاص انا بصرف نظر بس اتمنى ماتتكرر مره ثانيه

بعد ماراح الرجال سحب اخوة من ثوبه وراح لاخته
اسماء: فشلتنا يااخي بكل مكان ماتتعب عينك من تطليع البنات
فارس: في احلى من البنات
سعود: كف الحين يطيح اسنانك احترم وجود اخوك الكبير
فارس: افا ياابو رزان هذي جزاتي معتبرك واحد من اخوياي ومطيح معاك الميانه
سعود: أي لاتطيحها مره ثانيه اخاف تتعور
فارس: ههههه كركركركرووووش...حلوه
ضحكت رزان على شكل عمها فارس وهو يدغدغ بطنه ويضحك هو كالعاده مايقاوم ضحكتها شالها وحملها..
سعود: هالله هالله في وردتي ماعندي غيرها
فارس: وردتي بعد انا عمها اموون
وبقى فارس يتمشى مع اخوه واخته بس ابو طبيع مايجوز عن طبعه يمووت اذا مرت بنت وماطالعها..لازم يطالع ويوزع ابتسامات كرست

.............................

http://songs1.6arab.com/darine_aiwa.ram

كانت ترقص وتناطط بغرفتها كالعاده وتسمع دارين ايوه ايوه وهي تغني معاها بأعلى صوتها...فتحت امها عليها الباب
ام ريان: يعني اتمنى ادخل عليك مره الاقيك ترسمي او تقرأي أي شئ غير هالرقص والاغاني
ديمه وهي تحضن امها: اوووه ماما أي لووف ميوسك حياتي الرقص والهيصه
ام ريان: الله يخلف على عقلك يابنتي شوفي اختك دينا شحلاتها
ديمه: ماما انا غير ودينا غير ميولنا تختلف
ام ريان: الله يهديك ياديمه...وريني البدله اللي بتلبسينها بكره..
فتحت ديمه خزانتها الطويله العريضه وطلعت بدي اسود حلوو بدون اكمام ولاشئ وتنوره قصييييره حيل
ام ريان وهي مصدومه: بتلبسين هالبدله؟ لا والله مافيه شتقول الناس عني
ديمه: از ذير اني بروبلم مامي ... عادي حلووه بلييييز
ام ريان: اااااخ منك ياديمه بتجننيني انتي ليه ماتلبسين مثل كل البنات فستان بناتي حلووو مو هالتنوره
ديمه: اممممم طيب البس بنطلون جنز
ام ريان: لا ياشيخه خليك على هالبدله والله يعدي هاليومين على خير

طلعت امها من الغرفه وهي رجعت ترقص من قلب وتغني....غنوا معي ايوه ايوه..!!

.........................

اليوم التـــالي وصلت دينا من الكوافير قبل لايدخلوا البيت وقفت
دينا: سمومه لاتجامليني حلوو المكياج؟
اسماء: ياربي منك شوفي بتسألين مره ثانيه ترى بغسل وجهك بماي حاااار
دينا: لالا خلاص بسكت
اسماء: ههههه وربي تجننين بيدووخ تركان الليله
دينا: سموي اسمه تركي
اسماء: بدينا بشغل الحريم اقول ادخلي بس

دخلــوا الصاله ومالقوا غير ريان خطيب اسماء سابقا ومعاه رامي بالصاله...
لما طاحت عينه بعينها ماعرف شيسوي من يوم اللي افترقوا والعلاقه بينهم متوتره... مايكلموا بعض الا قليل كلام رسمي درجه اولى.. واسماء تتضايق من هالوضع تبي ترجع مع ريان مثل قبل عيال عم متفاهمين يحترموا بعض ...

اسماء حتى تكسر الموقف : شلونك ريان؟
ريان: الحمدلله يابنت العم... انتي شلونك؟ وشلون دراستك؟
اسماء: الحمدلله ... راامي تعال حبيبي
راح رامي لها وحضنها
رامي: جبتي لي معاك حلاوه؟
اسماء: أي جبت حبيبي تعال معاي فوق واعطيك

كان ريان يطالع اخته متغيره حيييل شكلها صاير غير بهالمكياج مطلعها قمر 14 ونعومه فوق نعومتها
دينا: ريان شفيك تطالعني
ريان: هههه متغيره والله يالدكتوره ربي يسعدك
ابتسمت لاخوها وصعدت مع اسماء ورامي فوق غرفتها...وهي تتوقع انها مقلوبه فوق تحت ملابس استشوار دخان عطور مكياج .. الله يستر
دخلت ولقت بنات خالتها... امل واميره واماني ولطيفه معاهم واكيد كمان ديمه ..... كانت وحده ناقصه جوري اخت اسماء تتسألون وينها ووين خالهم مساعد.... مسافره مع خالها الامارات 3 ايام وصادفت سفرتهم بوقت ملكة دينا وراجعين بكره ....

قام التبويس والاخذ باالاحضان لين هلكت دينا وجلست عالكنبه بغرفتها اللي كانت من اوسع غرف البيت

سرير كبير عليه نقوشات فرعونيه وغرفة للتبديل وزاويه فيها كمبيوتر والزاويه الثانيه تلفزيون ودي في دي
ومكتب كبير قريب منه.....

امل: قمر قمممممر يابنت خالتي متى اعرس ياناس
اسماء: تبين اخوي اخذيه
امل: مين سعود؟ لا ياشيخه سعود اخوووي واعز
اماني: ليه مطفوقه انتي عالعرس مدري
امل: ماتدرين؟ من لقافتك ياحلوه خلاص بسك لقافه
ديمه وهي ترقص : كماااااان جيرل ليتس داانس ويييييهاااا
اميره: جنيتي؟ لا اكيد جنيتي الله يعين اللي بياخذك انتي
اسماء: أي اموول اتحفيا بأخر اخبارك؟
امل: والله اخباري تماام بس بعض الناس مو تمام
اسماء: ايييييه فهمنا بس لاتكملين
اماني: انتي ليه ماتحبين اخوي هااااا.. وهو يحبك ويبيك
اسماء: امسكوها عني لااقوم اتوطاها هالملقوفه
اماني: اوووف الديموقراطيه معدوووومه
اسماء: عدال اقول اها بس اها....
قامت دينا وشالت عبايتها وقاموا يطالعوها مذهولين .. كان فستانها وردي يشابه فساتين باربي عاري من فوق وضيق مع شك وتطريز بلمعه... ومنفوش من تحت وكأنها اميره ... لفت حول نفسها بغرور...
امل: اللهم صلي على محمد وال محمد... اروح صحن بيض للحلوووين
دينا: هههههه
اسماء: خمسه وخميسه بعين الحسود واللي مايصلي عالنبي يولي واللي مو عاجبه ينتف حواجبه

ابتسمت دينا لبنات خالاتها وهي تتخيل شكل تركي بس يشوفها وهي ملكة جمال الليله ....

.............................

تحياتي بانتظار الكثير من الردود....

نواعم وينكم.......

تحياتي...

:sm124:
بنات علشاني ردوا ترى القصة رهيبة و أنا حطيت لكم أكثر من جزء علشان تشوفون إذا هي حلوة و لا لأ و إذا ما في حد رد راح أقول لمشرفة قسم القصص تلغيه...

أخليكم مع التكملة..
8
8
8
تمت الملكــة على خير وتركي مستعجل حيل يبي يشوف دينا... لوى على ريان يكلمه
تركي: ريان صارت الساعه 10 يلااا متى باشوفها
ريان: اللي يسمعك ماشفتها ابد ماكأنك دارس معاها
تركي: بس ولو هي الحين حرمتي باشوفها...
لف ريان لسعود اللي جالس جنبه بس من الجهه الثانيه....
ريان بصوت مايسمعه الا سعود: يااخي مادري هذا تريكان من وين مستورد ثقالة دمه... باقوم الحين ادوس في بطنه
سعود: اقعد مكانك زين
ريان: يبي يشوفها زهقنا
سعود: حلاله ومن حقه
ابو ريان: مااوصيك ياتركي دينا اغلى شئ عندي بالدنيا وابيك تحطها بعيونك وحاسب تزعلها
تركي : اكيد ياعمي اكيد
ريان: وان صار فيها شئ نخلص عليك
لف تركي عن ريان وهو حاقد.... سبحان الله شعور هاالاثنين متبادل..مايحبون بعض اصلا...
تركي: طيب عمي ممكن اشوفها؟
ابوسعود يتكلم: اكيد اخوي مابيعارض حلالك
ابوريان: اكيد طيب تفضل المجلس الثاني وانا اناديها

فارس مل مايحب الرسميات قام طلع من المجلس وهو يحس بالعطش دخل المطبخ الخارجي اللي صاير بالحديقه وشرب ماي حس ان فيه حد معاه بنفس المكان طالع يمين يسار واخيرا لقى الشخص.....
شافها تدور ورا الاغراض عن شئ.....رفعت راسها وشافته ابتسمت بخجل وقامت...
فارس: ديموووه؟؟ شتسوين يالخبله هنا لوحدك هاااا
ديمه: ادور القطوه ياحرام صغيرونه وراحت ورا هاالاغراض خاايفه مني
فارس: أي اكيد بتخاف مع هالكشه
ديمه: اوووه أي فورقت ... ازيك يارااجل؟
فارس: اجنبي ومصري...لاحول ولاقوه الا بالله من هالمجنونه.... بخير اسأل عنك انتي شمسويه بعدك على خبالك ماتتغيرين ياام كشه
ديمه: وات مين ام كشه
فارس: لحوووول يعني يور هير لايك فاااير فهمتي
ديمه: هههههههه ذاتس فااني فارس
قام يتعمق في طريقة نطقها لاسمه نطقته بشكل غريب.... هي اصلا هالبنت غريبه صايره خلط عربي اجنبي بس حلوه...
طلعت من المطبخ بعد ماعجزت تطلع القطوه وهي زعلانه
فارس: ليش ماده بوزك شبرين؟
ديمه: ابي القطوه
فارس: تاكليها انتي يعني ؟
ديمه: حد ياكل قطاوه.. ار يو كريزي؟
فارس: والله انتي مايندرى عنك كل شئ تسويه الا صرتي بأي صف؟
ديمه: باروح ثالث ثنوي
فارس: ذاكري زين وجيبي نسبه مو تفشلينا وتجلسين بالبيت
ديمه: وانت بأي صف
فارس: لعنبوك يالخبله صرت بالكليه
ديمه: خبله وخبله روح عني زييين فاضي

استغرب فارس اول مره بنت تكلمه بهالطريقه....
فارس: هيييه انتي انا فارس القبيله احترميني
ديمه بغرور: وانا ديمه تاج راسك اوكي
ابتسمت بغرور ومشت ومابقت الا ريحة عطرها اللي استنشقها....
ايالمهبوله المطفووقه اورييييك
مشى وراها لما حست بخطواته لفت وهي تطلع لسانها له...
فارس: قص اللي يقصه
ديمه: احم... يااخ لاتتعب نفسك وتجي وراي والله حر وقرف والله حاله المعجبين
فارس وهو يضرب يد بيد: انعجب بشنو اللهم لك الشكر لاجمال ولادلال مطفوقه
ديمه: شنووو؟ مخفوقه؟
فارس: هههههههههههههههااي لا وطرشه بعد فل اوبشن اجل
ديمه عصبت وكشرت هو خاف منها يممممه منها هذي مجنونه ياخوفي تقتلني الحين.....
ديمه: بتحترمني يامستر ولا انادي كلبي لولي
فارس: لاااااا وااع ديموو كل شئ الا هالكلب الاجرب حبوبه انتي ماتسوينها صح
ديمه: جبان صحيح والله مافل اوبشن في الجبن يالجبنه غيرك
فارس: انتي بتحترميني ولا اخليك تحترميني غصب

راحت لعند كلبها وفكته وسحبتها معاها
ديمه: بتسكت ولا اهده عليك؟
فارس : لالا ديمووو اكسري الشر حرام عليك والله توبه ماعاد اقول شئ
ديمه: أي افتكر بعد...
رجعت الكلب وربطته وهي راجعه تركض لفت رجلها والمتها ووجلست على اقرب كرسي وهي تتألم
جاء لها يركض...
فارس: من خبالك يالخبله ليه تركضين عسى ماتعورك
ديمه: تعورني يمكن انكسرت ... ياويلي مين اللي بيربي حيواناتي من بعدي بيموتون
وكانت بتصيح وهو ميت ضحك عليها ...
فارس: وربي مجنوووونه قومي داخل يلاااا
قامت وهي مو عارفه كيف تمشي لين وصلت لباب المطبخ الخلفي ودخلت البيت....
وبقت جالسه في المطبخ جات لها الخادمه خايفه....
الخادمه: ماما انت تعبان؟
ديمه: شوي...خلاص روحي نور
رفعت ديمه رجلها عالكرسي اللي مقابلها..
فارس: اسمها حلو نور ضياء شئ جميل
لفت لقته داخل المطبخ ...
ديمه: حتى الخادمه ماسلمت منك..تراها متزوجه
فارس: وجع ديموه لااجي واكسر رجلك الثانيه
ديمه: هههههه اذا تقدر تعال
جاء ورفع رجله حتى يدوس على رجلها الثانيه هي شهقت وغطت وجهها بيديها الثنتين
ديمه: الله اكبر الله اكبر اشهد ان لااله الا الله
فارس: ههههههههههه
شالت يدها وهي تطالع رجلها....
ديمه: انا عايشه للحين مادست على رجلي
فارس: أي عايشه حيه ترزقين
رن جواله طالعه وابتسم ...هي عارفه حركات ولد عمها وحبه للبنات....
ديمه بخبث: ها هذي نوره ولاخوله اللي داقه
فارس: لا وانتي الصادقه حليمه
ديمه: رد خلينا نسمع وناخذ كورسات
فارس عطاها بزي ودخل جواله وجاء بيطلع من المطبخ وعينه كانت في الارض وهي داخله تسكر عبايتها صدمت فيه بقوه خلتها ترجع للورا....
اميره : فااارس....
وقفت تطالعه ...ياااه يافارس من متى ماشفتك ..
فارس: اميرووه؟ اهلييين بنت الخاله
اميره: هلا وغلا اخبارك فارس؟
فارس: تمام... يلا سلااااام
راح وهي لازالت تطالع المكان اللي وقف فيه....بامووووت متى بيحس بالنار اللي داخلي متتتى تعبت وانا افكر واحاول احسسه بالحب اللي اكنه له وهو ابد من بنت للثانيه.....
راحت جلست جنب ديمه هي زعلانه
اميره: شفتي كيف ماعطاني وجه...كلمتين والسلام
ديمه: قلت لك انسيييه لاتفكرين فيه بس انتي ماتسمعين
اميره: ديموه احبه شفيك انتي
ديمه: اجل تحملي اللي يجيك منه...
اميره: بصبر وبتحمل علشانه بس.. الا مايجي يوم ويحس فيني وبتشوفين
ديمه: أي هووب ذاات سويتي....
اميره: قومي الرقص والردح قايم بره
ديمه: مااقدر رجلي اموور
اميره وهي تساعد ديمه تقوم : مايخالف قوومي
راحوا الثنتين الصاله وكل البنات يرقصون ... حطت اميره شريط رقص مصري وغمزت لديمه حتى ترقص ...
ربطت حول خصرها منديل ورقصت وكل البنات قعدوا ان رقص ديمه لايعلى عليه.....
كانت امها تطالعها وهي مبتسمه.... مع خالتها ام فؤاد
ام فؤاد: قمر بنتك يااختي الله يحرسها
ام ريان بفخر: امين يارب بس لو تترك جنونها احنا بخير....
ام فؤاد: معليش جنون بنات عادي بكرة تصير دكتوره قد الدنيا مثل اختها
ام ريان: اييه الله يوفقهم ويسعدهم...
ام فؤاد: امين يــارب..

.........................


كانت جالسه معاه ولوحدهم على نفس الكنبه مستحيه منه حيييل .. مو عارفه شتسوي ولا شتقول..
قرب منها ومسك يدها هالشئ اللي زاد من ارتباكها...
تركي: الف مبروك حياتي
دينا: الله يبارك فيك
تركي: واخيرا صرتي لي وملكي وحدي..مبسوطه؟
دينا بهمس: أي دامك معي
قرب منها وباس خدها هي ابتسمت وبعدت عنه...مسك يدها بقوه حتى ماتتحرك
تركي: وين رايحه..مو كفايه 4 سنوات وانا وراك وانتي تروحين وتتركيني
لفت تطالعه بنظره حالمه
تركي: مو مصدق انك لي
دينا: تركي
تركي: ياعيونه
دينا: فرحان؟
تركي: طاير من الفرح كنت ابيك بكل حواسي والحين حصلت على اللي ابيها
دينا: الله يديم الفرح
رن بهالوقت جوال تركي ارتبك وهو يطالع الشاشه...هدى؟ وجع شفيها ذي ماتحس على دمها...رد حتى ماتشك فيه دينا
تركي: الو...هلا والله...وين؟(وهو يطالع دينا)...مع خطيبتي سابقا وزوجتي حاليا..اوكي...اوكي انا اكلمك بعدين...الله يبارك فيك باي
سكر وقفل الجوال حتى ماتزعجه مره ثانيه
دينا: مين ياتركي؟
تركي: ههه لا هذا واحد من الربع يبارك لنا
دينا: وليه قفلته؟
تركي وهو يضمها: خلاص حياتي شعلينا منهم خلينا في نفسنا وبس..

..............................

من دقيقتين مل من جو الدخان وازعاج الشباب وضحكهم....فـ طلع بره..سمع صوت بنته رزان تناديه وهي بالمطبخ..دخل وهو مبتسم وشاف ريان مع اسماء اخته وامه وخالاته سلم عليهم وجلس على اقرب كرسي...
ام ريان: الا تركي ماطلع من المجلس؟
ريان: وين يطلع هالغثه ذا ... فشلنا يمه قدام الناس
ام ريان: ريان ايش هالكلام خلاص الحين هو زوج اختك المفروض تحترمه
ريان: يصير خير
قربت رزان من ابوها وهي تاكل حلاوه..
رزان: بابا
سعود: نعم بابا ايش تبين؟
رزان: ابي فستان عروسه مثل دينا
سعود: ههههههه الاخت مستعجله
اسماء: هههه يلا عقبالها
سعود: وعقبال عمتها
ام سعود: وابوها
تحولت ابتسامته الى تكشيريه... سكت ماقال شئ
ام سعود: هاشفيك مبلم..قول امين
سعود بهدوء: يمكن اظن تكلمنا في هالموضوع اكثر من مره
ام سعود: بسمه الله يرحمها راحت والحي ابقى من الميت...صار لازم ياولدي تتزوج وتجيب لهالمسكينه ام
سعود بعصبيه : ام رزان ماتت الله يرحمها ومااظن بيكون لها ام ثانيه من بعد بسمه
انسحب من المطبخ وصار في غرفة الضيوف تسند عالباب وقلبه يدق بسرعه...مستحيل اللي تقوليه يمه بسمه كانت ولازالت عايشه بقلبي وروحي...وماراح اسمح لنفسي اتزوج بعدها
سمع صوت ضحكه انثويه قطعت عليه حبل افكاره بعد عن الباب حتى يطلع لكن شافها بوجهه..دينا بنت عمه لابسه بس عبايتها وتاركه شعرها على كتفها....حاول يشيل عينه عن الحوريه الورديه اللي واقفه قدامه بس.....
تحركت عالسريع ودخلت الغرفه الثانيه وهي تسب عمرها ويدها على قلبها..خبله انا ياربي الحين شبيقول عني سعود...تضحك وفاله الشعر ... ابتسمت وجلست على طرف الطاوله..يااه ياسعود تغيرت ملامحك كثير..رفعت راسها للصور المعلقه عالجدار صور تجمعهم سوا هي وريان واسماء وسعود....وجوري وديمه كتاكيت صغار...

لفتت نظرها صورة سعود وهو يطالعها وهي مبرطمه زعلانه تطالع الايس كريم اللي بيده..هههههه يومها كنت مشتهيه ايس كريم وقالي سعود باروح اجيب لك ..راح اخذ له ونسااني وبقيت طول اليوم زعلانه...
غريبه الدنيا من يوم احنا صغار الكل يقول سعود لدينا ودينا لسعود ليين فاجأ سعود عمي بقرار خطوبته من بسمه ..انا بالنسبه لي قراره ماحرك فيني شعره وحده لاني ماكنت ابيه.....

بعدها فاجأت انا اهلي بقرار سفري الى امريكا....انصدم عمي ابوسعود وسألني : وحياتك مع سعود؟ قلت له : سعود شاف اللي يبيها وبياخذها...قالي عمي: ماياخذ هالبنت لو مهما يصير.....حتى لو على موتي
فهمت عمي وجهة نظري واني ماارغب في سعود وسعود نفس الحكايه مايبيني وكلها يومين وتجي ضيفه جديده بيتهم ولازم يتقبلها ويتقبل فكرة انها صارت وحده من بناته ولازم يحبها....
وبقت اسماء تراسلني وتقولي اخبارهم ورسلت لي صور عرس سعود كانت بسمه حلووه وجميله وطيبه ومؤمنه باختصار فرحت لسعود.....بس لما ماتت زعلت عليها رغم اني ماكنت اعرفها زين بحكم دراستي....
الله يرحمك يابسمه.....

................................

لما طلــع من بيتهم جلس في سيارته وفتح جواله وهل عليه سيل من المسجات ورا بعض من هدى عشيقته اللي تحبه وتموت على التراب اللي يمشي عليها...وهو ابـد يوم عندها وعشره عند غيرها..الا دينا اللي جننته من شافها حاول يقرب منها ويلعب عليها مثل مالعب على بقية البنات بس دينا صدته وكل مايقرب منها تبعد اكثر واكثر..لين زهق ويأس وقرر يخطبها.. وتصير الاميره الجميله للوحش الكاسر...

اتصل في هدى وردت عليه بعصبيه....
هدى: سويتها يالنذل
تركي بملل : قصري حسك
هدى وهي تصيح : ليش ياتركي انا احبك تعرف يعني شنو احبببك
تركي: افهمي يابنت الناس دينا صارت حرمتي وصياحك ماراح يقدم ولا يأخر
هدى: حرام عليك سلمتك نفسي على طبق من فضه وبعدها تتركني وتروح لها
تركي: من يقول بتركك ... دينا زوجتي وانتي حبيبتي
هدى بهدوء: حياتي تركي اتركها وارجع لي انا احبك وابيك واوعدك اعطيك اللي تبي
تركي وهو مستمتع بتعذيبها: اكيد ولابس كلام ياهدى
هدى: اكيد ياروحي
تركي بخبث: مادري ليش انتي زعلانه ياحياتي رغم اني ببقى اشوفك وراح تبقى علاقتنا مثل اول واحسن بعد...
هدى وهي تمسح دموعها : جد؟
تركي: جدين بعد...مااستغنى عنك يالحلوه
هدى: كنا ياحياتي احلى اثنين مادري ليش دخلت دينا بيننا
تركي: اوووه هدى شقلنا
هدى: خلاص بسكت رغم ان الغيره حارقتني
تركي: خلاص باطفي نارك ياناري وجنتي انتي
هدى بدلع: ههههههه ياعمري عليك.....اممممم ابي اشوفك..
تركي: لالا هدى خليني اضبط اموري مع دينا وبعدها يصير خير
هدى: اوووه تركي الحييين
تركي: تدرين انا جايك الحين ... بالشقه طبعا؟
هدى: طبعا لاتتأخر
تركي: لادقايق بس...

سكر واتجه ناحية شقته اللي اشتراها مخصوص حتى يجلس مع هدى فيها......
ودينا المسكينه ماتدري عن كل هذا.....

...........................

اليوم التـــالي عالظهر الساعه 12 رجعت جوري مع خالها مساعد من الامارات...
دخلوا بيت ابوسعود وكان فااضي
جوري: يؤؤؤؤ غريبه مافي احد باروح المطبخ اكيد امي هناك
مساعد: اجل خذي شناطك وانا باروح بيتنا
جوري وهي تسحب خالها: يلا عاد ميسووو عن الدلع
مساعد: كف الحين على خدك قالت ميسو قالت
جوري: احمد ربك ادلعك
مساعد: جوير وجعين....
دخلت المطبخ ولقت امها جالسه تطبخ....اشرت لخالها يجي معاها ويسكت ..وقربت من امها بشويس
جوري: بممممممممممم
نقزت امها وطاح الصحن اللي بيدها....لما لفت وشافتها جوري كانت بتهاوشها بس....
جوري: ههههه قبل ماتهاوشيني يمه بذمتك مااشتقتي لي؟
ام سعود: غربلك الله من بنت...كذا بغيتي توقفين قلبي ...هلا اخوي شلونك يالغالي الحمدلله عالسلامه
قرب من اخته الكبيره وباس راسها وبعدين ضمها.....
مساعد: مشتاق لاحلى اخت بالعالم
ام سعود: والله انا ياخوي مشتاقه لك اكثر...لو بس يلين راسك وتوافق تجي تسكن معانا احسن من قعدتك في البيت الكبير لوحدك
مساعد: يااختي مااقدر اترك بيت الوالد الله يرحمه فاضي...
ام سعود: بعدين نتفاهم الحين انتوا تعبانين من جابكم؟
جوري: تاكسي هالسايق مايرد على جواله وربي لاذبحه واقطعه واوزعه
ام سعود: الله يغربله مع حركاته اللي مايبطلها....الا عسى ماطلعت لك قرون ياخوي
مساعد ينزل راسه ويدخل يده بشعره : شوفي القرون بس قصيتهم قبل لااجي
جوري: هههههههههه ياحليلك يامساعد
ام سعود: ياطويلة اللسان اسمك خالك مساعد
مساعد: سمعتي انسه جوري لاتطيحين الميانه
قربت من خالها وحطت راسها بحضنه: كيفي خالي انا حرره مساعد سعودي اوكي
ضربها على راسها بخفيف: روحي عني يالدبه.... يلا اختي انا باروح
ام سعود: لاوالله ماتروح ياخوي نام وارتاح وغداك وعشاك اليوم عندنا
مساعد: يلا شورك وهداية الله
جوري: يمه وين اسماء؟
ام سعود: روحي لها فوق
جوري: عن اذنكم

صعدت عالدرج بسرررعه ودخلت اول شئ غرفة رزان ولقتها تلعب فله..
جوري: مين احلى رزان ولا فله؟
فرحت لما سمعت صوت عمتها وراحت ركض لحضنها
رزان: عمتي تأخرتي اشتقت لك
جوري: هههههههه كلها 3 ايام
رزان: جبتي لي فله وباربي
جوري: اكيييد واخذت لك حبيبتي العاب كثييير الحين الخادمه تجيبهم لك...(باست بنت اخوها) يلا انا باروح الى اسماء
رزان: بنام معاك عمتي اليوم بغرفتك
جوري: من عيوني الثنتين ..يلا كملي لعب قلبي

راحت غرفة اسماء ودخلت عليها بدون ماتدق الباب وهي تغني...مشتاقلك بدي شوفك زاد الشوق بقلبي كتيير
اسماء: لاتقولي صعبه ظروفك اللي بيعشق ماعندو كبير يااااابعدي كل من لي متى جيتي
راحت وحضنت اختها بقووووه
جوري: كسرتيني عاااااد
اسماء: وحشتييييييني حييييل
جوري: والله وانتي اكثر سموووي
اسماء: ياشيخه رحتي وخليتني لوحدي ماعندي حد اتهاوش معاه عالطالعه والنازله
جوري: أي مسكينه انا تفرغين فيني عصبيتك..اهئ اهئ ماحد يحبني
اسماء: بل عليييك كل هالحب من ابوي وامي وتقولين محد يحبك حتى فروس اللي مايحب حد يحبك
حطت جوري اصابعها الخمسه على عين اختها : خمسه تشوفيهم؟ بعينك يالحسوده موووتي قهر يحبوووني
اسماء وهي تشيل يد اختها: ياشبخه حرام عليك عيني بتروح فيها....ها اخذتي اللي وصيتك عليه
جوري: افا عليك كل شئ جبته ....
اسماء: مشكوووره حبيبتي
جوري: فارس نايم؟ وحشني الدب
اسماء: أي نايم
جوري: باروح له برب
اسماء: تيت

راحت غرفة اخوها وكانت بارده حيل مرفع التكييف على اعلى شئ ..دب مايتأدب عن هالحركات لين يمرض ونبتلش فيه...جلست عالسرير ويدها على راسه
جوري: فارس
فارس: ــــــ
جوري: فيفوووو
فارس:ـــــــ
جوري: فروووسي
فتح عينه ابتسم وحضنها بقوه
فارس: جوري؟ متى جيتي
جوري: ههههههه الحمدلله توقعت يجيني كف اول مااصحيك وازعجك...تو بس وصلت اخبارك حبيبي
فارس: بخير دامك بخير...وحشتيني يالدبه 3 ايام لاتتصلين ولاشئ لو مااسأل عنك ماتسألين
جوري: اعذرني فروووس والله ماافضى هناك من مكان لمكان..
فارس: مسمووحه هالمره...خالي مساعه وينه؟
جوري: تحت ابشرك بيبقى معانا لليل
فارس: هيييييه ونااسه
قامت خففت على التكييف ولفت تكلمه بعتاب
جوري: فارس كم مره اقولك لاترفع عالتكييف كذا حرام عليك بتمووت
فارس: عادي جوري والله
جوري: اموت لو يصير فيك شئ يالدب... مادري ليش ماتخاف على نفسك
فارس: يابعد عمري هاالاخت وين انا اشوف مثلك......
جوري: فديتك ياخوي...يلا كمل نومك
فارس: اوكي سكري الباب وراك
جوري: اووكي

طلعت وسكرت الباب وراها وتركته ينام.....



>>>>>>
تحياتي..

انا مش فاهمة انى عايزة ايه بالضبط يعنى بعد ما ضيعت وقتى والله مش فاهمة بالضبط ايه المطلوب يمكن انا اللى مش بافهم وخيالى ضيق لهذا الحد مش عارفة بالضبط لكن كل الى عارفاه انى ضيعت وقى ومفهمتش حاجة و اسفة على النقد السخيف ده

شكراأختي و لو اني ما قريتها حبيت أرد عشان تعرفين اني مريت ر رح أقراها بس افضى و انا معاك يا حلوووو

مسلمة أظن القصة لسه ما خلصت

حبيبتي اول شئ مشكوووووووووره

القصه طويييييييييييييييييييله بالمره

اتوقع انتي حتسوينها روايه صح

بصراحه شدتني قصة سعود وبنته رزان ...........ودي اعرف وش نهايته

وكمان ديناو تركي الخاين ......... ودي اعرف نهايتهم


مشكوره بس لاتطولين القصه الباقي كثييييييييير

ترى قرأتها كلها